ACTO DE CLAUSURA "COOPERACIÓN GALEGA: O MUNDO QUE QUEREMOS"

    A Sala Capitol de Santiago de Compostela reuniu o pasado venres 4 de abril de 2014 aos escolares e profesores/as dos 5 centros participantes no programa “Cooperación Galega: o mundo que queremos” nunha divertida, orixinal e emotiva gala de clausura. Divertida pola variedade de números e espectáculos e polas grandes doses de humor desprendidas polos compoñentes de “100tolas”, o grupo de teatro encargado de guiar a gala. Orixinal por trocar a formalidade dun salón de actos por un alternativo local de ocio con amplo espazo para moverse, bailar a ritmo do rap de Pachamama Crew na semipenumbra baixo focos con luces multicolor. E emotivo porque establecíase o punto e final para un programa que encheu de actividades e de visitantes aos cinco centros escolares galegos (Santiago, Melide, Ourense, Monfero e Viana do Bolo) durante todo o curso académico, froito do traballo e dedicación de persoas vinculadas a un grupo de ONGs que apostan pola construción dun mundo mellor. 

   Como punto final desta travesía mostráronse fragmentos os traballos elaborados nos centros participantes, tanto na modalidade de fotoxornalismo como no formato de podcast radiofónico. Podedes ter acceso á totalidade dos mesmos a través da web de cooperación galega. Andrea, Ana 1 e Ana 2 (de 1º da ESO) subiron ao escenario para representar ao CPI Virxe da Cela e para explicar aos asistentes programas de radio gravados no noso centro, que están pendurados no noso blogue na pestana “O Xestal nas Ondas” (http://cpivirxedacelasolidario.blogspot.com.es/p/o-xestal-nas-ondas-radio-monfero-39.html). 

    A parte de coñecer ás profes e aos rapaces e rapazas dos outros centros, foi tamén un momento para o reencontro, coincidindo cos nosos xa amigos salvadoreños Iris, Yasmine e José Manuel,e cos responsables do proxecto, membros de ONGs e talleristas que estiveron no noso cole dirixindo os obradoiros (María Caride, Rosa, Montse, Óscar, etc). Ignacio (4º da ESO) foi o “number one” na pista de baile, aínda que as profes Teresa e Adela, e os rapaces e rapazas de 1º da ESO facíanlle a competencia como bailongos. E que mellor que finalizar a festa cunha parada obrigada para xantar no novo centro comercial de Santiago!!! Que llo digan a os cativos de 1º da ESO, que iniciaron a Ignacio (4º) na cultura do churrasco. Galicia Calidade!!

Crónica acto de clausura cooperación galega from satelite1

LANCY DODEM VISITA DE NOVO O CPI VIRXE DA CELA

   “A viaxe ao norte” non só é o título do libro que acaba de presentar Lancy Dodem, o primeiro neno apadriñado pola Fundación Vicente Ferrer, senón tamén unha metáfora do choque de culturas, a oriental e a occidental, que tivo a oportunidade de experimentar cando deixou a súa India natal para asentarse en España. É un libro de memorias, habitado por todas as persoas que o rodearon na súa infancia e adolescencia: os seus amigos, pais, irmáns, incluso o propio Vicente Ferrer, que tanto peso tivo na súa vida. Está repleto de experiencias, de anécdotas, de sabiduría… e a través da súa lectura poderemos coñecer o noso país a través da mirada do “outro”, daquel que chegou de lonxe e descubriu con sorpresa todo o que para nós xa pasa desapercibido… 

   Lancy presentou o seu libro na librería Arenas da Coruña, e aproveitou a súa “viaxe ao noroeste peninsular” para visitar o CPI Virxe da Cela, acompañado por Yolanda Ferrer, a “embaixadora” da FVF na Coruña. Un ano máis comeron connosco no comedor escolar, saboreando os pratos elaborados polas nosas cociñeiras e mantendo unha animada conversa cos comensais, como se de familia se tratase. Xa en sesión de tarde, Lancy impartiu dúas charlas ao alumnado de EI e de EP, amenizadas pola espontaneidade dos máis pequenos/as do noso cole, que fixeron simpáticas preguntas e intervencións. A clausura do acto realizouse coa foto oficial da firma do libro “Mi viaje al Norte” en presenza da directora do centro e un forte aplauso que convidaba a Lancy a regresar o próximo ano de novo ao noso centro. Os/as que teñan curiosidade por facer unha “viaxe ao norte”, lembrade que tedes o libro á vosa disposición na biblioteca escolar.

http://www.diariodeferrol.com/articulo/comarcas/monfero-fundacion-vicente-ferrer-visita-alumnos-virxe-da-cela/20140405030018080788.html

Crónica a viaxe ao norte de lancy dodem from satelite1

CAMPAÑA DE SENSIBILIZACIÓN VI RASTRO SOLIDARIO E OPERACIÓN QUILO 2014

Un ano máis, e con este xa van seis, o CPI Virxe da Cela organiza o VI Rastro Solidario. Nesta ocasión contamos coa colaboración da AMPA da nosa escola, que prestarán a súa axuda tanto para difundir a actividade, como para levala a cabo. Esperamos que todos xuntos logremos o noso obxectivo, concienciar á nosa comunidade educativa de que unha pequena acción pode cambiar o mundo. Nesta ocasión, en lugar de cartos faremos as compras a través do troco con alimentos non perecedeiros, e deste xeito axudaremos a todas esas familias que están nunha situación crítica, a través da Cociña Económica de Ferrol. O alumnado de 1º da ESO visitará todas as aulas da nosa escola para repartir entre os rapaces e rapazas as circulares que informarán ás familias desta actividade, e pedirán a súa colaboración. Para nós e sumamente importante este intercambio xeracional, e que a mocidade transmita aos máis pequenos a súa experiencia e os animen a formar parte desta gran familia: Monferosolidario.

RADIO TEHUACÁN: 92.1 FM

Iris, Yasmin e José Manuel son tres xóvenes de El Salvador que visitaron  hoxe o noso centro (martes 1 de abril de 2014) e impartiron o último obradoiro no marco de "Cooperación Galega: o Mundo que Queremos", dentro do Plan Proxecta da Xunta de Galicia. A pesares do seu malestar físico debido ao jetlag e aínda aclimatándose as condicións do  frío e humidade, estes rapaces/zas foron quen de dar unha grande lección ao noso alumnado, non so explicando o seu traballo na Radio Tehuacán 92.1 FM, emisora comunitaria no Baixo Lempa (El Salvador), senón dando unhas pinceladas da súa loita por reivindicar a liberdade e cambiar a difícil situación na que se atopa o seu país. Son auténticos heroes, combinando a súa faceta xornalística, os seus estudos para lograr unha meta no futuro e facéndose cargo ou axudando ás súas familias e as súas comunidades. A través da súa voz e da súa testemuña estamos máis preto de coñecer as difíciles condicións de vida dun país que viviu unha tremenda guerra civil, e que na actualidade sofre a dura violencia exercida polas perigosas "maras". Recordaron aos nosos alumnos/as a sorte que teñen por poder vir á escola, estar ben alimentados, e non ter que traballar explotados como parte da infancia do seu país. 

Foron dúas horas de charla que souberon a pouco, así que verémonos de novo nun par de días, nesa celebración final que terá lugar o vindeiro venres día 4 de abril en Santiago. Grazas pola vosa lección. Queremos tamén destacar a presenza de Rosa López Miramontes, quen visitou o noso centro en cada un dos catro obradoiros desenvolvidos no noso centro a través do Plan Proxecta "Cooperación Galega: O Mundo que Queremos", e a María Caride, coordinadora deste programa e que sempre estivo ao outro lado do teléfono ou do ordenador para guiar aos docentes que participamos nel. Benvidos a Monfero e esperamos contar convosco de novo o próximo curso académico. Esta é a vosa casa.

MI VIAJE AL NORTE

 Lancy e Yolanda Ferrer cos profes do CPI Virxe da Cela

Todos coñecemos a Lancy Dodem, primeiro neno apadriñado pola Fundación Vicente Ferrer, xa que visitou o noso centro en numerosas ocasións. O vindeiro xoves 3 de abril estará de novo no CPI Virxe da Cela, esta vez para impartir charlas de sensibilización ao alumnado de educación infantil e primaria, aproveitando a súa viaxe a Galicia para presentar o seu libro "Mi viaje al Norte" (librería Arenas, A Coruña, mércores 2 de abril 2014). Aquí tendes información da FVF sobre esta actividade: 

Queremos invitarte a la presentación del libro Mi viaje al Norte de Lancy Dodem. Una conmovedora historia del primer niño apadrinado por la Fundación Vicente Ferrer, que actualmente es portavoz de la organización. Lancy Dodem pone de manifiesto en su relato el contraste entre dos realidades, Oriente y Occidente, y el abismo que las separa. A través de su narración, el autor nos anima a tomar las riendas de nuestras vidas con valentía. Con la presencia de: Sra. Cristina De La Vega, responsable del Gabinete de Comunicación de la Gerencia Integrada de A Coruña. Sra. Yolanda Ferrer, representante de la Fundación Vicente Ferrer en A Coruña. Sr. Lancy Dodem, autor de Mi viaje al Norte y portavoz de la Fundación Vicente Ferrer. Día: Miércoles, 2 de abril Hora: 19.30h Lugar: Librería Arenas, Calle Cantón Pequeño 25, A Coruña

Mi viaje al norte en coruña (1) from satelite1

LOGOS RCES

Como ben sabedes, o pasado 15 e 16 de marzo, 17 alumnos/as dos centros de ensino pertencentes á Rede de Centros Escolares Solidarios do Plan Proxecta participaron nas Xornadas de Convivencia que tiveron lugar en Lugo. Antía e Sofía, dúas alumnas do CPI Virxe da Cela, representaron ao noso cole nestas xornadas, e xunto co resto dos mozos e mozas participantes, traballaron intensamente para a consecución dun logotipo da Rede de Centros Escolares Solidarios, ademais de determinar unha acción conxunta a realizar para a conmemoración do vindeiro Día Internacional do Voluntariado (5 de decembro). A organización da RCES achéganos as 5 propostas xeradas,para poder facer a elección da imaxe que nos representará. O prazo para as votacións remata o día 11 de abril, así que podemos ir botándolle unha ollada ás cinco propostas, para posteriormente decidir nas aulas a que máis nos guste.

ÁRBORE: Este logotipo amosa como a RCES é o tronco de onde emerxen os valores e rasgos identificativos do programa nos diferentes centros educativos (solidariedade, compromiso, empatía, creatividade, fins comúns, etc.) As cores marrón e verde identifican ao logotipo

ESENCIA EN LIÑAS: Este logotipo é froito dun proceso reflexivo amplo. Nun iniciio o logotipo partía dunha gran man que sostiña unha cometa (que simbolizaba os valores e a esencia da RCES). Na corda da cometa aparecían figuras humanas que amosaban a componente humana do programa. Esa imaxe inicial foi evolucionando ata que o grupo decidiu centrar o logo nunha imaxe máis simple dun trazo abstracto desa cometa que simboliza a esencia dos valores solidarios do programa. As diferentes cores e os diferentes grosores das liñas amosan a diversidade de persoas, necesidades e procesos que teñen cabida na RCES.

 LETRAS CELTAS:  O logotipo é froito da vinculación de Galicia á cultura celta. As dúas imaxes identificativas do logo son a letra “V” e a letra “G” no alfabeto celta, amosando a mensaxe “Voluntariado Galego”. Posteriormente o grupo, por cuestións estéticas, colocou en horizontal as letras, reubicando a posición inicial das siglas RCES. As cores azul e verde son as que dan identidade ao logo.

PROVINCIAS: O logotipo amosa o concepto de “Rede” vinculado ás 4 provincias galegas, dende unha compoñente humana do proxecto (de aí as figuras humanas en cada provincia). No interior de cada provincia aparece un símbolo identificativo de cada una delas (Torre de Hércules, Muralla de Lugo, Augas Termais, e o mar e os peixes). As iniciais RCES interconectan a cada unha das provincias nun proxecto compartido. As cores verde, azul, amarelo e vermello identifican a proposta. 

PUZZLE:  Este logotipo emprega o puzzle como metáfora da unión e a rede, na que as diferentes pezas do puzzle encaixan por un fin compartido. Na intención dos creadores/as está que as iniciais RCES se inserte no interior da peza do puzzle. O logo combina a cor verde e amarela (esperanza e ilusión).