KAILASH SATYARTHI APOIA A CME EN GALICIA

FOTOS DE GRUPO "EU VOTO POLA EDUCACIÓN"

"EU VOTO POLA EDUCACIÓN" NO CPI VIRXE DA CELA

Un ano máis o CPI Virxe da Cela únese á CME (Campaña Mundial pola Educación), que nesta ocasión identifícase cun lema tan significativo como “Eu voto pola educación”. O alumnado de 2º da ESO foi o principal dinamizador desta campaña non noso centro educativo, visitando as diferentes aulas da nosa escola para sensibilizar a alumnado e profesorado da importancia da súa participación en prol dunha educación universal, integradora e de calidade. Repartiron un lote de materiais, entre eles un póster para personalizar en cada clase, tarxetas para escribir as nosas peticións e ideas enfocadas a un cambio e mellora na educación, así como adhesivos co logo e lema da campaña.

A campaña tivo su cumio na semana do 20 ao 26 de abril, coincidindo coa SAME (Semana de Acción Mundial pola Educación). Así, o venres 24 de abril efectuamos unha votación en toda regra. Todos os nenos e nenas visitaron, acompañados polos seus profesores/as, unha mesa electoral que estaba situada na entrada do edificio de secundaria. Depositaron nunha furna decorada para a ocasión as súas papeletas e xuntándose por aula para facer unha “foto de familia” acompañados do seu póster personalizado conxuntamente e que os identifica como grupo.

Proximamente pasaremos a colocar papeletas e carteis nun enorme panel expositivo, para así poder compartir os nosos soños e desexos cara un cambio na educación, e pouco a pouco tratar de ir levando a cabo o que estea nas nosas mans. 

Crónica eu voto pola educación from satelite1

4 ALUMNAS DO CPI VIRXE DA CELA IMPARTEN UNHA CHARLA NO SEMINARIO INTERNACIONAL SOBRE O DEREITO Á EDUCACIÓN

       “A educación cambia o mundo”, esta é unha afirmación que compartiron todos os/as asistentes ao Seminario Internacional sobre o Dereito á Educación tras presenciar a charla-obradoiro “Experiencias de ensinanza-aprendizaxe para cambiar o mundo”, impartida por catro alumnas do CPI Virxe da Cela o pasado martes 21 de abril de 2015 (Facultade Ciencias Educación USC, Santiago de Compostela). 

       Ana Pena e Andrea Brage (2º ESO), xunto con Antía Gómez e Sofía Pena (4º ESO) demostraron as súas capacidades docentes guiando e dinamizando a un grupo de 40 persoas (estudantes universitarios, docentes, educadores sociais, voluntarios, psicólogos, etc), que tiveron que efectuar diferentes actividades relacionadas coa CME (Campaña Mundial pola Educación), que este ano ten o lema “Eu voto pola educación”. Comezando por unha auténtica votación con papeletas e furna, e finalizando un divertido “selfie”, o obradoiro ofreceu un marco ideal para reflexionar sobre a importancia da educación e para definir, aínda que utopicamente, un sistema educativo ideal e esbozar unha imaxe do docente que fora quen de materializar ese soño. 

     O CPI Virxe da Cela leva desde o ano 2009 participando activamente na CME (Campaña Mundial pola Educación) e a SAME (Semana de Acción Mundial pola Educación), enmarcando estas actividades dentro do proxecto Monferosolidario, no que se conxuga a educación en valores e a educación para o desenvolvemento. Agradecemos ás ONGs Entreculturas e Ayuda en Acción, encargadas de organizar a CME 2015 en Galicia, por convidarnos a estas xornadas e ofrecernos un ha oportunidade para difundir o noso traballo.

 

Intervención cpi virxe da cela from satelite1

Crónica seminario internacional sobre o dereito á educación from satelite1

DOSSIER DE PRENSA CME 2015

Dossier de prensa_cme2015 from satelite1

GRAVACIÓN VÍDEO CAMPAÑA MUNDIAL POLA EDUCACIÓN

Da man da Fundación Entreculturas recibimos a visita dun pequeno equipo de comunicación disposto a recoller as impresións que docentes e alumnos/as do CPI Virxe da Cela temos sobre a CME (Campaña Mundial pola Educación), evento celebrado no noso centro educativo anualmente no mes de abril desde o curso académico 2008-2009. Son por tanto seis campañas con numerosas anécdotas e lembranzas, loitando en conxunto polo dereito a unha educación universal e de calidade.

Todas as persoas que sentaron diante da cámara na xornada do martes 3 de marzo de 2015 (grupiños de alumnado de 6º de primaria e da ESO e as profesoras que coordinan o proxecto Monferosolidario) reflexionaron sobre os cambios que se deron no noso centro desde a chegada da CME, xustificando a importancia de loitar polo dereito á educación e os logros que se conseguiron en relación a este dereito. Está claro que a día de hoxe o noso alumnado é consciente de que a educación cambia vidas, tanto é así que varios rapaces e rapazas comentaron exemplos no seu ámbito máis próximo que exemplifiquen este feito.

Esta entrevista, que formará parte dun vídeo final que promoverá a Campaña Mundial pola Educación 2015, e na que participarán outros centros educativos galegos, está dando a oportunidade a alumnos/as e docentes para expresar peticións ás persoas con responsabilidade política, reivindicando a importancia de traballar en prol dunha educación para todos e todas, así como lanzarse a soñar e falar en voz alta de todos aqueles desexos que quizás un día, se todos unimos as nosas forzas, poidan converterse en realidade. 

Gravación do vídeo para a campaña mundial pola educación from satelite1