Accións de comunicación de guerrilla en marcha! Rede Compás

O pasado 30 de maio a mocidade da #redcompás saíu á rúa con mensaxes claras e creativas.

En Silleda, quixeron chamar a atención sobre o transporte público no rural. Como? Cun esqueleto viaxeiro que percorreu paradas abandonadas de tren e bus. O Día D plantárono na porta do Concello xunto cun panel de fotos e fixeron enquisas á veciñanza. O obxectivo: levar os resultados ao pleno municipal o 9 de xuño.

En Monfero, o alumnado da Rede puxo o foco na defensa do sector primario e do medio ambiente como clave para garantir o futuro do rural. Fixeron unha pancarta e leron un manifesto diante de veciñanza e autoridades locais.

A comunicación de guerrilla é acción directa, creativa e reivindicativa no espazo público, para sacudir conciencias e abrir conversacións importantes.

Seguimos creando, soñando e loitando por un rural digno e vivo.

Imaxes das accións de guerrilla do alumnado dos dous centros educativos.

Rede Compás: xuventude unida por un futuro digno no rural galego

 Xa contamos co vídeo resumo da xuntanza da Rede Compás en Allariz. Son máis de 50 mozas e mozos de cinco concellos para crear propostas sobre vivenda, transporte, educación e emprego que lanzaron nun manifesto por un futuro digno no rural galego.

Durante estes meses levan a cabo as súas accións de comunicación de guerrilla, están a reunirse con institucións locais e autonómicas e, en setembro, levarán o seu manifesto ao Parlamento Europeo.

Porque rural tamén é futuro. Queremos liberdade para elixilo!

Obradoiro “Achegarmos á Historia dos Medios en Galego”

 A Asociación de Medios en Galego e a Área de Igualdade, Lingua e Dereitos Civís da Deputación da

Coruña veñen de publicar a Guía Didáctica: Coñecendo a Historia dos Medios en Galego (2025). Esta

conta con dúas unidades didácticas: unha centrada na orixe, historia e evolución dos medios en galego; e

outra na situación, posibilidades e recursos que ofrecen os medios en galego na actualidade. Ademais,

conta cuns apuntamentos para coñecer a historia e acceder aos recursos dixitais dispoñibles dos medios

en galego; un anexo cun listado, descrición e ligazón a máis dun centenar de medios en lingua galega de

diferentes temáticas e épocas; e o encaixe curricular de cada recurso para alumnado da ESO e

Bacharelato.

Para comezar a difusión deste novo recurso didáctico, a Área de Igualdade da Deputación promoveu a

elaboración de obradoiros que traballen con estes contidos en tres centros educativos da provincia, entre

os que foi seleccionado o CPI Virxe da Cela. Este obradoiro, de título “Achegarmos á Historia dos

Medios en Galego”, foi impartido por David Miguel Rodríguez Martínez: historiador e co-autor da guía didáctica.

Imaxe de Miguel Rodríguez, o historiador que deu valor a Historia dos Medios en Galego na biblioteca do centro.

O obxectivo principal do obradoiro é conectar o pasado e o presente dos medios en galego. Desta

forma o alumnado poderá comprender a súa evolución e as limitacións que sufriron no pasado, e ao

mesmo tempo analizar a grande oferta que hoxe existe. Isto permitirá transmitir unha mensaxe positiva

e ofrecer exemplos para que o estudantado incorporen ao seu repertorio informativo estas

ferramentas e así comprender mellor o entorno que os rodea. É dicir, consolidar a idea de que é posible

consultar información do día a día do alumnado en xornais escritos na súa lingua.

A charla mesturará un formato teórico, sobre os contidos referidos ao longo da guía didáctica, e un

traballo máis colaborativo, practicando metodoloxías activas para favorecer a adquisición de

aprendizaxes e o traballo do alumnado cos materiais físicos e dixitais en grupos de discusión.

Comparanse medios do pasado e do presente para ver reminiscencias nas temáticas e preocupacións da sociedade

galega ao longo da historia, ao mesmo tempo os cambios e avances sociais en materia de linguaxe,

discriminación, sexismo etc.

Imaxe da guía desde a que se pode descargar para o seu uso educativo.

Esta actividade tamén foi recollida polo Diario de Santiago:

Imaxe da actividade recollida no Diario de Santiago.

Enraizadas

Enraizadas nace coa necesidade de visibilizar e poñer en valor as estratexias de sustentabilidade da vida que se leva a cabo no rural e, máis concretamente, o papel das mulleres neste proceso. Este proxecto educativo de educación social na escola da man da Asociación EuroEume, busca contribuír á visibilización e o recoñecemento das mulleres na sociedade, incidindo nun cambio de mentalidade no que os traballos reproductivos e as persoas que os sustentan se convertan en referentes. Imaxes das dinámicas da actividade. Buscando asi mesmo, espallar os valores e reflexións do ecofeminismo, contribuíndo ao desenvolvemento rural, reflexionando sobre a soberanía alimentaria, a custodia do territorio e os coidados e comunidade. Nesta nova edición de 2024, a temática son os coidados e comunidade, onde de maneira transversal, traballaremos valores como a igualdade, a creatividade e a sustentabilidade. Nesta primeira sesión o alumnado de 5º curso traballamos  sobre as nosas referentes e outras cunha perspectiva máis global para identificar a conversa que queremos desenvolver nos seguintes obradoiros da actividade.

OLIMPIADA DA SOLIDARIEDADE: ENTRENO CONCIENCIA

 

O alumnado da ESO participará no terceiro trimestre nas Olimpiadas da Solidariedade organizadas pola ONG Taller de Solidariedade. Nas materias de Valores Éticos e Relixión realizaremos as actividades olímpicas "Entreno Conciencia" e iremos acadando as diferentes medallas que nos permitirán subir ao pódium e acreditarnos como Centro Olímpico Entreno Conciencia. Cada unha das actividades levarase a cabo seguindo un calendario con "Días Internacionais", datas destacadas: -6 Abril: Día Internacional do Deporte e a Paz -23 Abril: Día Internacional do Libro -8 Maio: Día Mundial do Comercio Xusto -5 Xuño: Día Mundial do Medio Ambiente -Xuño: Evento Deportivo Solidario.

Cartel Medal La Negra by veracruces on Scribd