OBRADOIRO REDE SOLIDARIA DA MOCIDADE ENTRECULTURAS

O Mércores 21 e o venres 23 de xaneiro 2026 contamos coa visita de Estefanía Franco e Patricia Meléndez, da ONGD Entreculturas, que impartiron un obradoiro a cada un dos grupos da ESO para abordar a través de diferentes dinámicas o concepto de Cidadanía Global. Esta foi unha oportunidade ideal para a creación de grupos focais e debatir sobre as problemáticas locais. A rapazada visibilizou as súas necesidades, tendo en conta a situación que se está a vivir no rural galego, onde a falta de transporte público e lugares para a socialización supón unha fenda ás veces difícil de superar. Outro dos obxectivos que pretendía este obradoiro era presentar e reactivar a Rede Solidaria da Mocidade Entreculturas, unha rede que tivo grandísima importancia entre a mocidade do noso centro entre os anos 2009 e 2019, e que desde a situación sociosanitaria da covid-19 foi perdendo forza. 

Como participante do obradoiro, considero que foi unha experiencia moi enriquecedora. Non só aprendemos conceptos novos, senón que tamén tivemos a oportunidade de expresar o que sentimos sobre a nosa realidade como mozos e mozas do rural. Gustoume especialmente ver que as nosas voces foron escoitadas e tomadas en serio. Saín da actividade coa sensación de que, aínda que sexamos novos, podemos contribuír a mellorar o noso entorno se traballamos unidos. Oxalá esta rede solidaria recupere a forza que tivo no pasado e se converta nun espazo onde a nosa xeración tamén deixe pegada. Marcos Garabana (4º ESO).

PRESENTACIÓN FERRAMENTA DE AVALIACIÓN DE COMPETENCIAS DE CIDADANÍA GLOBAL. MOVEMENTO 4.7

O pasado curso académico o noso centro participou na experimentación cunha nova ferramenta para a avaliación de competencias de Cidadanía Global e Desenvolvemento Sostible, que foi deseñada e impulsada desde as ONGs da Alianza 4.7 (Alboan, Entreculturas, InteRed e ONGAWA). É por isto que fomos convidados para participar nunha sesión en liña de presentación da ferramenta cos equipos dos 7 centros que participaron no proceso, para comentar os primeiros resultados da implementación. Consistiu nunha sesión de 90 minutos, o luns 19 de xaneiro, en horario de 15.00-16.30h. O espazo foi facilitado polo equipo da Universidade Loyola Andalucía, e acompañado por compañeiras da Alianza 4.7.

 

UN ENCONTRO DE CORAZÓNS: VISITA AO CENTRO DE DÍA DO XESTAL

 Un ano máis, o Nadal serviu de ponte para unir as xeracións do noso concello. Nunha xornada cargada de emoción, o alumnado de Infantil, acompañado polos rapaces e rapazas de 3º e 4º da ESO do Colexio Virxe da Cela, visitaron o Centro de Día do Xestal para compartir o seu tempo e alegría cos nosos maiores.

Música, tradición e moita ilusión

O centro encheuse de vida coas voces dos máis pequenos e a enerxía dos maiores. Durante a visita:

• Os nenos e nenas de Infantil fixeron rir e aplaudir a todos cantando e bailando o tradicional "Mi burrito sabanero".
• Non faltaron as panxoliñas nin o son das gaitas e pandeiretas, que puxeron o ritmo tradicional a esta mañá tan especial.
• Pero, sobre todo, o que máis brillou foi a ilusión reflectida nas caras de pequenos e maiores ao compartir este ratiño xuntos.

Un agasallo con raíces

Para selar este momento de unión, o alumnado fixo entrega dunha Flor de Pascua moi especial, acompañada dunha mensaxe que emocionou a todos os presentes:

"Vedes as follas novas, coma nós? Pois para que esas follas medren fermosas e cheguen ao máis alto, necesitan algo esencial: as raíces. Vós, os nosos queridísimos maiores, sodes esas raíces fondas e poderosas que nos suxeitan á terra. Sodes a sabedoría que nos dá seguridade e o amor que nos permite soñar."

Con este pequeno detalle, quixemos enviarlles un abrazo quentiño a cada un dos seus corazóns, desexándolles unhas festas cheas de saúde, paz e, sobre todo, moitísimo agarimo.

Grazas, maiores, por ser o noso mellor exemplo!

 

CONMEMORACIÓN DO 25 N NO CPI VIRXE DA CELA

 

 A comunidade educativa do CPI Virxe da Cela reuniuse o martes 25 de novembro de 2025 no patio cuberto para conmemorar unha data moi significativa: o Día Internacional da Vioencia contra a Muller. O acto iniciouse cunha pequena presentación de posicionamento para combater esta problemática social e xa a continuación alumnado e profesorado cantou e signou o famoso tema La Puerta Violeta de Rozalén, toda unha metáfora do escape e a liberación das mulleres. Agradecemos a Lola Flores, alumna de 4º da ESO, e a Diego Garabana, alumno de 2º de ESO, por ofrecernos a súa voz e a súa guitarra respectivamente, interpretando a música en directo. 

Este martes 25 de novembro de 2025 reunímonos todo alumnado e profesorado do CPI Virxe da Cela no patio cuberto co fin de conmemorar o Día Internacional da Violencia contra a Muller. Neste acto, cantamos e representamos con lingua de signos a canción de “La Puerta Violeta”, de Rozalén. Ademais, tivemos a sorte de que a miña compañera de 4º da ESO, Lola Flores, deleitounos e guiounos coa súa gran voz, acompañado por Diego Garabana de 2º da ESO. Foi un acto dun día que hai que reivindicar e que todos/as/es debemos coñecer, por iso está moi ben que nos colexios se conmemorar. Alexandre Doutón (4º ESO).

A conmemoración do 25 N no noso centro  foi un acto sinxelo pero cargado de significado, no que quixemos mostrar o noso malestar fronte a esta realidade. Participar nesta actividade fixo que todos e todas tomásemos maior conciencia sobre a importancia de loitar contra a violencia machista e de apoiar ás vítimas. A letra da canción de Rozalén, La Puerta Violeta, que fala de liberdade e de romper co medo, encaixaba perfectamente coa mensaxe do día. É fundamental que nos centros educativos se organicen iniciativas como esta, porque axudan a educar, sensibilizar e lembrar que a igualdade é tarefa de todos. Foi unha experiencia positiva que sen dúbida recordaremos no futuro. Marcos Garabana (4º ESO).

I EDICIÓN POLO DÍA UNIVERSAL DOS DEREITOS DA INFANCIA NA COMARCA DO EUME

 

Este mércores 19 de novembro reunímonos na Casa da Cultura de Pontedeume tres colexios pertencentes á comarca do Eume (o CPI Virxe da Cela de Monfero, o CEIP Eladia Mariño de Cabanas e o CEIP de Andrade), para conmemorar o 20 de novembro, Día Universal dos Dereitos da Infancia. Xunto cos meus compañeiros da clase de 4º da ESO acudimos alí xa que, como case todos tocamos algún instrumento, como o tambor, a gaita, ou pandereta, pedíronnos que fóramos facer a entrada e o peche do acto. Durante este acto interviron varios representantes políticos desta comarca e tamén representantes dos centros educativos, como o noso director Iker Sánchez. Máis tarde seguimos coas exposicións do alumnado dos tres centros, as cales todos fixeron moi ben, e finalmente voltamos outra vez coa nosa actuación musical, e cun picoteo antes de saír. Foi un acto moi agradable no que a Asociación Euroeume, a asociación que organizou o acto, nos tratou moi ben. Alexandre Doutón (4º ESO).

VIDEOCONFERENCIA REPRESENTANTES ALUMNADO REDE COMPÁS

 Luns 27 outubro 2025, ás 12:00 horas. 

ACTIVIDADE FINAL REDE COMPÁS

Mércores 15 outubro 2025. Roi Quitián, da asociación AGARESO (Asociación Galega de Comunicación para o Cambio Social) visitou hoxe o noso centro para facer a última das actividades integradas dentro do proxecto Rede Compás, que deu inicio en setembro de 2024. Todo o alumnado do CPI Virxe da Cela que de maneira voluntaria decidiu formar parte deste proxecto para a mocidade tivo a oportunidade de analizar todos os obxectivos acadados e de deseñar a maneira de dar continuidade a esta iniciativa, xa que a Rede Compás foi unha semente que pode seguir medrando.

A Rede Compás  intégrase na convocatoria Erasmus Plus KA154, financiado por la UE, e realizarse a través dun convenio de colaboración con AGARESO. Consta de varias formacións online e presenciais, unha xuntanza con outros centros galegos en abril de 2025, unha comunicación de guerrilla e un acto de incidencia política no noso concello (xuño 2025) e unha viaxe ao Parlamento Europeo en setembro 2025. O CPI Virxe da Cela é un dos cinco centros galegos que forma parte da Rede Compás (cun total de 15 alumnos/as participantes e 3 docentes).

Este proxecto estivo moi ben, incluso me atrevo a dicir que a REDE COMPÁS foi o mellor que tivemos, polo menos nestes últimos 4 anos en secundaria. Foi unha gran experiencia, na que aprendimos a organizarnos e loitar polo que queremos. Nel fixemos varias actividades, destacando entre elas o Hackatlón en Allariz xunto con outros 4 centros de Galicia (Brión, Bueu, Silleda e Viana do Bolo) durante 3 días, e alí, ademáis de facer moitas amizades, puxemos entre todos as nosas ideas en común. E para finalizar, algúns tivemos a sorte de visitar o Parlamento Europeo en Bruselas con alumnos/as e profesorado dos outros centros, facendo desta, unha experiencia inesquecible. Pero non só acaba aquí, esperemos que a Rede Compás soamente fora unha semente en nós, e sigamos organizándonos e loitando xuntos polas cousas que queremos. Alexandre Doutón (4º ESO). 

A8 Difusión, transferencia y sostenibilidad by veracruces

PRESENTACIÓN DA EXPERIENCIA EN BRUXELAS DO ALUMNADO REDE COMPÁS

 Despois da viaxe realizada en setembro a Bruxelas, os tres alumnos/as do CPI Virxe da Cela que representaron ao noso centro educativo nesta actividade explicaron o mércores 1 de outubro de 2025  ao resto do alumnado que forma parte da Rede Compás en que consistiu esta experiencia. Poder ser recibidos por persoas vinculadas á política europea no Parlamento de Bruxelas e facerlles chegar as peticións da mocidade galega foi un momento moi importante, algo que estivemos preparando durante todo un curso. Ademais deste compoñente de activismo político e cidadanía responsable, estes tres estudantes tiveron a oportunidade de relacionarse con outros mozos e mozas dos outros catro centros educativos galegos que participan no proxecto. Foi unha experiencia vital, iso foi evidente, por iso agradecemos a AGARESO (Asociación Galega de Comunicación para o Cambio Social) ter pensado no noso centro para participar neste proxecto Erasmus+. Aínda que a Rede Compás chega ao seu final, sabemos que está plantada a semente e seguramente todas as aprendizaxes servirán para crear un grupo de asociacionismo xuvenil que atenda ás demandas da xente moza.

ALUMNADO DO CPI VIRXE DA CELA VISITA O PARLAMENTO EUROPEO EN BRUXELAS

SCHOOL TO SCHOOL 2025-2026

 Iniciamos o curso escolar 2025-2026 mantendo o compromiso que temos coa Fundación Vicente Ferrer, a través do proxecto School to School, un intercambio cultural e tradicións cunha escola da India, a Konampalli School. 

Este curso a temática a tratar vai a ser os "Deportes e Xogos".

Guion Tema4 Deportes -e Xogos Galego by veracruces

Congreso Internacional VI FENDA DIXITAL – INTELIXENCIA ARTIFICIAL XENERATIVA E OS NOVOS DESAFÍOS NA EDUCACIÓN, Curitiba, Brasil

Hoxe estivemos no Congreso Internacional VI FENDA DIXITAL – INTELIXENCIA ARTIFICIAL XENERATIVA E OS NOVOS DESAFÍOS NA EDUCACIÓN, que se celebrará os días 16, 17 e 18 de xullo de 2025 en Curitiba, Brasil, en modalidade híbrida (https://www.even3.com.br/vifendadixital?lang=pt).

Esta é unha gran oportunidade para comprender as achegas e os retos que presenta a IA dentro do ámbito educativo. Ademais, conta coa ventaxe de que as diferentes aportacións poden volver a verse a través da canle de Youtube do evento (https://www.youtube.com/@FendaDixital).

Aquí deixamos a presentación que realizamos sobre os desafios que temos ser quen de afrontar para unha adecuada implementación da Intelixencia Artificial (IA) nas nosas escolas acompañada das experiencias de Célio Manfré Filho (DidaTic/UEL, Brasil) e Marco Bento (ESE, Politécnico de Coimbra, Portugal) e moderado polo Dr. Jesús Rodríguez Rodríguez (USC).

https://www.youtube.com/watch?v=gpL89y0WdY4

Imaxe autoeditada da presentación do centro.

Entrevista ao alumnado representante do grupo de mocidade da Rede Compás no noso centro: de Monfero a Bruselas para poñer en valor o sector primario

As competencias comunicativas e ecosociais do noso alumnado son o mellor exemplo para creer nunha sociedade mellor.

A Rede Compás é unha gran oportunidade para poñelas en valor.

Grazas a Eva Mazás Arnoso do Diarío de Ferrol por esta estupenda entrevista. Darlle voz a mocidade é darlle voz a vida e ao futuro. 

 Imaxe autoeditada da nova recollida no Diario de Ferrol.

Conclusións do Diálogo sobre Educación Ambiental para a Sustentabilidade organizado desde o Movemento 4.7

  Cartel do Plan de Acción de Educación Ambiental para a  Sostenibilidade.

O pasado 19 de xuño  participamos do Diálogo sobre Educación Ambiental para a Sustentabilidade organizado desde o Movemento 4.7. Foi un encontro moi valioso e enriquecedor onde as achegas e as conclusións acadadas nos amosan a importancia de contar cunha educación transformadora, crítica e comprometida coa xustiza social e ambiental.

Ademais, este diálogo amosa como a forza colectiva pódese xerar aínda que nos  atopamos en distintos territorios e contemos con diferentes experiencias para pensar en conxunto o futuro da Educación Ambiental.

Aquí, deixamos documento de conclusións do diálogo, que recolle as ideas e as propostas principais compartidas durante a sesión esperando que poidan ser punto de partida para seguir impulsando este traballo noutros espazos e realidades.

Para contar con moita máis información temos a web do
Movemento 4.7 na que ademais desta conclusións podemos ver otras actuacións desta xornada e as actividades desta rede.

dialogo-eas-conclusiones-movimiento-47 (1).pdf de Maria del Camino

Save the Children. Carreira Solidaria

Desde Save the Children chegounos un correo de agradecemento pola colaboración do conxunto da Comunidade educativa na carreira solidaria pola infancia que precisa de protección. Aquí deixamos a mensaxe e o diploma de participación. Parabens!!! Alumnado e familias

GRAZAS!.

Querida comunidade educativa,

O 20/06/2025 recibimos un ingreso pola cantidade de 400€ do voso centro.

En nome dos nenos e nenas dos nosos programas, queremos agradecer profundamente o voso esforzo e dedicación. Grazas por implicarvos con tanta ilusión e por transmitir a importancia desta causa ao voso alumnado, que, co seu entusiasmo, puxo en marcha todos os recursos ao seu alcance para apoiar aos máis vulnerables.

Grazas tamén ás familias que contribuíron xerosa e solidariamente co seu donativo. O seu apoio permítenos seguir loitando polos Dereitos da Infancia, garantindo que os nenos e nenas sobrevivan, accedan a unha educación de calidade e estean protexidos; en definitiva, que teñan a oportunidade dun futuro mellor.

Facémosvos chegar tamén o noso selo de centro solidario. Podede descargalo e incluílo na vosa web ou blogue. Este selo representa todo aquilo polo que traballamos en conxunto: a defensa dos Dereitos da Infancia.

A vosa solidariedade marca a diferenza.

Con gratitude,

Equipo de Centros Escolares 

Diploma_15087_20250623 (1).pdf de Maria del Camino